Кавто тёжат колмоце иестэ нолдазель библиографической указатель Мордовиянь фронтовой писательтнень ды поэттнэнь кувалт. Сетнеде, кить максызь эрямост Ине Отечественной войнасонть.

 Сон панжови од поэтэнть Евгений Иванович Агеевень лемсэнзэ. Тесэ ёвтневи сонзэ эрямодонзо, максовить фотографият. Эрзянь цёрась эрясь нурька эрямо. Ансяк комсь иеть. Чавовсь тёжа вейксэсядт ниленьгемень колмоце иестэ Воронеж ошонть ало.

 Е. И. Агеев чачсь тёжа комськавтовоце иестэ Дубёнка ёнксонь Кобалесэ. Тетязо ульнесь кедьёроков ломанекс, важодсь столярокс. Эйкакштнэ, конатнеде ульнесть сисем, важодсть, лездасть кудоютконь тевень топавтомсто. Вейкеяк стяко ульцява эзь чийне. Секскак эрясть - нужачи эзть нее.

 Тёжа вейксэсядт комсь вейксэеце иестэ Евгений тусь тонавтнеме земской школань васенце класс. Цёрынесь тонавтнесь вадрясто, секскак школань прядомадо мейле казезель Шнамонь конёвсо. Вейкесь эйстэдест нейгак ванстови государственной архивсэ.

 Стихень сёрмадомо Женя уставась котоце классо. Сынь лиснесть районной ды республиканской газетатнесэ, «Сятко» ды «Пионерэнь вайгель» журналтнэсэ.

 Школань прядомадо мейле Агеев важодсь Дубёнкань школасо тонавтыцякс. Ульнесь литературной кружоконь участникекс, конань прявтсоль Андрей Софронов (Юргай), содавикс сёрмадыцясь ды тонавтыцясь.

 Тёжа вейксэсядт ниленьгемень васенце иестэ кучизь тонвтнеме Горький ошонь связистэнь училищав. Агеевень фронтсо ютавтозь шкадонть минь содатано сёрматнестэ, конат ванстовить республикань архивсэ, зярыятне печатазь «Письма фронтовые» пусмосонть. Сынь сёрмадозельть ютко шкасто, окопсо, зярдо ульнесь сэтьме. Сёрматнесэ неяви покш ёжомарямось ды седейризксэсь семиянть кувалт. Эрьва сёрмасо Евгений Иванович кевкстни тетянзо- аванзо, патянзо- ялаксонзо шумбрачидест, кевкстнесь седе, мезе ялганзо сёрмадыть фронтсто. Сёрмады виев ломантнеде, тиринь модань вечкемадо, куроконь изнямодо. «И когда кончится война, приятно будет сознавать, что в разгроме фашистских войск, в нашей победе есть и моя частица. Я бился за родную землю, я освобождал вместе с доблестной Красной Армией наши города, села»- истя сёрмадсь Женя кудов тёжа вейксэсядт ниленьгемень кавтоце иестэ панжиковонь комськавксовоце чистэ.

 «Сердце просится в бой, чтобы поскорее рассчитаться с мерзавцами и начать жить по- человечески, а то эти людоеды Гитлера отняли всю радость нашу и молодость. Дорогие мои, берегите своё здоровье. А обо мне не беспокойтесь. Я вернусь с победой домой…» Те ульнесь меельце сёрмазо. Ансяк изнявкс марто тензэ кудов эзь саво велявтомс.

 Похоронкась Кабаево велес Агеевтненень сась эйзюрговонь меельце читнестэ тёжа вейксэсядт ниленьгемень колмоце иестэ. Женянень ульнесь ансяк комсь иеть.

 Сон эзь кенере нолдамс вейкеяк стихень пусмо, сень лангс апак вано, эйстэдест сермадозельть пек ламо.

 Республикань архивсэ ванстовить Е. И. Агеевень рукопись марто кавксо папкат. Ламотне стих марто. Эйстэдест кавксоньгеменьде ламо. Теке марто, ламо нурька морынеть, ёвкст, ёвтнемат. Евгений Иванович сёрмадсь весемень кувалт: пертьпелькстэнть, тиринь ёнксто, эрямонь мазычиденть, вечкемадо.

 Эсензэ литературной тонавтыцякс ловсь Ф. И. Беззубовань ды В. В. Маяковскоень. Икелень школань программас, эрзянь келень литературной учебникс совавтозельть Е. И. Агеевень стихензэ. Сонзэ шкинеманзо тонавтнесть, кода Пушкинэнь, Толстоень, Чеховонь.

 Г.П.Евстигнеева

 А.Полежаевень музеень научной сотрудникесь

 «Вайгель»