Батаев Павел Петрович , Сайгушев Лев Васильевич, Чудайкин Иван Семенович (Полярный), Сафронов Андрей Матвеевич (Юргай) … содасынек, арась минь не лемтнень? Арсян, аламо кие марсинзе. А сынь емавтызь войнань отьмантень  од шкаст,  ерокчист, палыця оймест. Паряк, арсесть меельцеекс, зярдо эль-эль таргасть оймест, сынст а стувтсызь, кармить лецтнеме сэтьме, войнавтомо шкастонть.  Лиссь а истя. Тона чисэ  евтыть сынь сюкпря аламонень. Аламотнень ютксо А.Полежаевень музеень важодицятне. Сынь свал тейнить  экспозицият, конат евтнить Ине войнасо маштозь мокшонь ды эрзянь поэтнэде. А вейке ие научной сотрудниктненень савсь  пурнамс эрявикс материалт: документт, сермат, произведеният. Тенде евтни тенек Галина Евстигнеева, А.Полежаевень музеень научной сотрудникесь.

-Зяро кенере тееме ломанесь , бути пингензэ кувалмозо – комсь-комсь вете иеть? Вельть, аламо. Теке марто кой-кинь эрямось теке пек цитниця сяткине.

Батаев Павел Петрович чачсь 1915 иестэ Куйбышевской областень Клявлинской райононь Новые сосны велесэ. Эйкакшокс кадовсь урозокс. Секс вейксэ иесэ церынесь тусь скалонь ваныцякс. Эрявсь трямс пря. Зярдо топодсть тензэ кемкавтово Верепазось пачтизе Москов ошов. Тосо Батаев Паша прядсь средней школа. Тиринь енксс велявтсь ероков церакс. Роботась районной газетань редакциясо. Сермадсь стихть.  1933 иестэ сась Саранскоев ды кармась важодеме Мордовской Госиздательствасо, мейле «Ленинэнь киява» комсомольской газетасо.

Зярдо зэрькстась войнась, васенце читнестэ Батаев Павел, тердемань апак учне,  тусь фронтов. Сон ульнесь «Ворошиловец» газетасо корреспондентэкс. Кемсь – минек масторось изни, тенде и сермадсь. Теде башка сермадсь стихть эсь эрзянь енксстонть, вечкемадонть, олячиденть. Чавовськак ручкань кирдезь, зярдо анокстась газетань од номер. Мольсь 1942 ие. Маштовсь эрзянь поэтэсь Смоленской областень Медынь ошсо.

Войнанть шкасто мокшэрзянь поэтнэ ды прозаиктне эсь евтнемаст, стихест, политической статьяст печатасть аволь ансяк фронтовой газетас, а кучсть эйсэст тылэнь редакциятнес. Покш тевекс ульнесь, зярдо понгильть воевамо малавикс ломань марто. Истя кувать вейсэ тюрсть ятонть каршо Василий Радин-Аловской ды Артур Моро. Кавонест нолдасть комсеце стрелковой бригадань газета. «Впред за родину» - истя лемезель газетанть. Моро ульнесь редакторокс, Радин – ответсвенной секретарекс. Мейле, зярдо Моронь саизь лия газетас, оязо кадовсь тарказонзо. Кавонест эрзянь цератне казезельть орденсэ ды зярыя медальсэ. Войнадо мейле Моро эрясь Московсо, косо вастневсь Лидия Русланова марто. Радин велявтсь Мордовияв, поладызе тесэ литературной роботанзо. Важодсь «Эрзянь правда» ды «Советской Мордовия» газетатнесэ, Мордовиянь радиовещаниянь ды телевидениянь госкомитетсэ. Нолдась 17 книгат.

Эряви тешкстамс, течинь чис А.Полежаевень музеень сотрудниктне вешнить материалт, конат сюлмазь минек сермадыцятнень марто, конат неизь войнань отьманть. Ламот эйстэст емастькак тов, кадызь од шкаст ды уцяскаст. Миненек эряви тень кирдемс мельсэ ды седее сеетьсэ ледстнемс.

      Г. П.Евстигнева ,

А.Полежаевень музеень научной сотрудникесь.

«Вайгель»