Полежаевень литературной музейсэ  ванстовить материалт,  конат алтавить содавикс эрзянь  журналистэнтень, прозаикентень, драматургонтень, Ине войнань участникенть Иван Антоновнень.

Иван Захарович  чачсь 1919 иень якшамговонь 18-це чистэ Чувашиянь Сигачи велесэ. Кассь, чарькодеви, аволь сюпав эрзянь семиясо. Школанзо  прядомадо мейле тонавтнесь  лесотехнической рабфаксо.

1936 иестэ сермадызе васенце стихотворениянзо «На смерть Горького». Сон печатазель  райононь газетасо. Шкань ютазь саизь  Ардатовань райгазетань секретарекс.

Воевамо тусь ятонть каршо  1942 иестэ. Васенце бойтнеде мейле сермадсь  аволь покш стихотворения «Клятва». Те стихотворениянть васенце редакциязо  ули Полежаевень музейсэ. Истя жо тесэ улить лия стихотворениянзояк, конат сермадозь фронтсо 1942-43 иетнестэ. Ютксост  «Зимний фриц», «Фриц в аду», «Солдат идет».

Васняяк Антонов служась фронтсо рядовоекс,  мейле саезель  «Родина зовет» газетань ответственной секретарекс. 141 стрелковой дивизиянть марто сон ютызе войнанть педе пес. Солдатонь кизэ ютась Чехословакиява,Венгриява,Австриява,Румыниява.

«Родина зовет» газетасо сон сермадсь солдатонь подвигте. Иван Захаровичень стихтне, моротне, фельетонтнэ тердсть изнямос.  Солдатнэнень вечкевсть Антоновонь произведениянзо. Ловномс фронтовой газетасо эсеть кувалт - те марявсь сехте питней казнекс.

Войнадо мейле Антонов важодсь Саран ошсо «Красная Мордовия» газетань корреспондентэкс, «Литературной газетань» ды  «Литература и жизнь» газетатнень собственной корреспондентэкс. Сермадсь ламо очеркт войнадо. Те «Ухабы на дорогах», «Трудодень» ды лият, конат печатазельть центральной газетасо ды журналсо.

Романось «Вейке семиясо» - васенце эрзянь роман, алтазь  дивизиянтень, кона пурнавсь Мордовиясо.  Те романсонть панжови весе нациятнень ютксо ялгаксчинть питнезэ.

Эрзянь кельсэ  романось лиссь 1956 иестэ. Седе тов ютавтозель рузонь кельс. Мокшэрзянь печатьсэ Антонов яволявтызе эсь прянзо кода литературной  критик. Произведениятнень кисэ, конат сермадозельть фронтсо Антонов казезель омбоце степенень Отечественной войнань ды Якстере Теште орденсэ. Иван Антонов кулось 1960 иестэ. Ноябрянь 1-це чистэ. Калмазь Ичалка райононь Тарханово велесэ.

      Г. П.Евстигнева ,

А.Полежаевень музеень научной сотрудникесь.

«Вайгель»