Саран ошсо Полежаевень музеесь панжовсь  2001 иестэ, аштемговонь 5 – це чистэ.

Те кудось, козонь теезь музеесь путозь  революциядо икеле. Таго-зярдо эйсэнзэ ульнесть эйкакшонь яслят, школа, санэпидиомстанция, ней вана  - музей.

Полежаевень эрямо кизэ ды шкинеманзо ванномо ушодсь васняяк И.Д. Воронин профессорось, ней сонзэ тевенть поладызе Н.Л. Васильев профессорось. Гавриил Вдовин сермадсь Полежаевде опера, кона ульнесь путозь МР-нь рузонь драмтеатрань сцена лангсо 1978 иестэ.

Эрзя-мокшонь поэтнэ Александр Мартынов, Павел Любаев ютавтызь Полежаевень стихензэ эрзянь  ды мокшонь кельс.

Минек музеесь явови вете залга. Эрьвась евтни поэтэнть кодамояк вейке эрямонь пелькстэ.

Васенцесэнть кортави Полежаевень эйкакшпингедензэ: тесэ невтезь Рузаевкась, Струйский помещикенть усадьбазо. Стенастонть лангозонок ваныть поэтэнть покштянзо-бабанзо. Неть портретт-копият. Оригиналтнэнь сермадынзе  18-це пингестэ Ф.С. Рокотов артыцясь. Ней сынь невтевить Московонь Третьяковской галереясо. 

Полежаевень чачомазо, Леонтий   Струйский тетянзо эрямо кизэ невтевить невтевить архивной документ вельде, конатнень минь саинек республиканской архивстэ, ды Московонь, Петербургонь, Пензань, Муромонь ды лия ошонь   архивтнестэ, ловнома кудотнестэ.

Вишка церынекс Полежаев ульнесь превейкс, бажась тонавтнеме. Неть бажамотнень рединзе тетязо Леонтий Струйский  ды 1816-це иестэ ускизе церанзо Московов тонавтнеме.

Омбоце нупальсонть  минь несынек Москов ошонть, университетэнть ды Полежаевень тонавтниця оянзо-ялганзо  фотографияст. Тесэ жо  жо  Бибиковонь жандармской полковникенть яволявтомазо Полежаев лангс, кона колызе поэтэнть весе эрямо лувонзо.

Витринас кельгстинек ламо архивной документ, рукописть, оянь  лецтнемат, конат саезь Московонь, Петербургонь, Пензань ды лия ошонь архивтнестэ. Истя жо, тесэ ашти Николай  императоронть записказо, конань  вельде сон тердекшнизе Полежаевень «Сашка» поэманть кувалма ды тень служамсто тешкстазель Спасский казармань казематс, косо  и  кармась сэредеме туберкулезсо.

Седе тов, невтеви унтер - офицерэнь мундир, кодамо  кандтнесть се шкасто. Теске жо невтеви се шкань винтовка.

Ниле иеть Александр Иванович кандсь служба Кавказсо, косо потмоежозо седе паролгадсь, туберкулезось аламодо потась. Полежаев тесэ сермадсь ламо стихть, нолдась кавто стихотворениянь сборникть. Лиссть  «Эрпели», «Чир-Юрт» поэматне. 1832 ды 1838 иетнестэ нолдазь Полежаевень книгатне ванстовить минек музейсэяк.

Седе тов евтневи поэтэнть меельце чидензэ: ниле иень ютазь Кавказсто велявтомадо мейле поэтэсь ульнесь наказазь розгасо. Теде мейле Полежаев пильге лангс эзь стякшно. Тельня сон кулось. Те ульнесь якшамговонь 28-це чистэ 1838 иестэ.

Полежаев сермадсь пек ламо стихотвореният.  Ансяк эрясь аламо, весемезэ 34 иеть. Сон эсь стихсэнзэ «тюрсь»  самодержавиянть каршо. Секс эзь вечкеве инязоронтень.  Печатазелть эрямстонзо 5 стихень томт, анся сынст жандарматне пултызь, кадовсь ансяк вейке. Саран ошсо ули куро, кона кантни  Полежаевень лементь, тесэ ашти мазый таркасо Александр Полежаевнень памятник, Электроникань, экономикань ды правань колледжесь лемдязь сонзэ лемсэ.

А А. Полежаевень музейсэнть ютавтовить мероприятият, творческой вастовомат, выставкат, конат алтавить Мордовия республикань  содавикс ломаннень, сермадыцянень ды республикасо ютыця покш событиятненень.

      Г. П.Евстигнева ,

А.Полежаевень музеень научной сотрудникесь.

«Вайгель»