«Вайгеленть» эфирсэ мольсь кортамо ине рузонь поэттэнть. Кода сонзэ лемесь сюлмазь минек мокшэрзянь масторонть марто, кодатт ней сюлмавомат кирдевить Мордовиянть ды Пушкинэнь  раськенть ютксо? Неть кевкстематнень лангсо минь арсинек Галина Евстигнеева 

А. Полежаевень музеень научной сотрудникенть марто.

-Галина Петровна, алкукс А.С.Пушкинэнь лемезэ сюлмазь эрзямокшонь масторонть марто?

-Пушкинэнь эрямо ды сермадома кинзэ исследовательтне содасызь и трокс, и кувалт. Минек краеведтнэнь седеест эжди  се тевесь – Мордовияв сакшность ды эрясть тесэ инее поэтэнть эйкакшонзо ды нуцьканзо. Пушкинэнь раськензэ сралесть ней весе Европаванть ды ламотне эйстэст нейгак вастневить, лецтнить кодамо ульнесь покштяст. Минек енкссо эрсесть А.С.Пушкинэнь Мария тейтерезэ ды Александр церазо. Поэтэнть куломадонзо мейле Наталья Николаевна низэ лиссь мирденень (1844 иестэ) Петр Петрович Ланскоень экшс. Сынст чачсть колмо тейтерест. Покш тейтерест Александра крестямсто каязель Николай I императоронть кедь лангс, лиякс меремс инязорось ульнесь крестной тетязо. Александра седее мейле ульнесь фрейлинакс Россиянь инязоронть дворецсэ. Мирденень лиссь пензенской помещикенть Иван Андреевич Араповонь экшс. Ды тусь эрямо Ковылкинань Лашма Велес, косо Араповонь ульнесь покш имениязо. Александра Петровна Лашма велесэ эрямсто сермадсь аванзо Наталья Николаевнадо ледснемат.

- Галина Петровна, тей сакшнокшнось и Александра Петровнань патязо, Пушкинэнь тейтерезэ.

- Эрьва кизэ тей сыль Мария Александровна Пушкина – Гартут. Мария Александровна мирдензэ куломадо мейле эрясь ськамонзо, эйкакшонзо арасельть. Секскак сон лездась васня эйкакшонь трямо Александра сазоронстэнь, а седее тов ютавтнель шканзо Воскресенской Лашмасо. Ульнесь содавикс Лев Николаевич Толстой марто, кона теезь сонзэ Анна Каренинань прототипекс. Мария Александровна ульнесь сэрей, мазый чама, пек превей ломань. Ансяк стихть тетянзо ладсо эзь сермадо. Вадрясто кортась французонь  ды немецень кельсэ. Мария Александровна меельце эрямо иензэ ютавтынзе Лашма велесэ Александра Петровна вакссо. Лездась тензэ эрьва-кодамо тевсэ, ульнесь малавикс оякс. Кулостькак патят-сазорт ве иестэ, те ульнесь 1919 ие. Калмазь кавонест Санкт-Петербургсо. Мария Александровна Пушкина – Гартут эрясь кавксоньгемень иеть.

-Лисни Пушкинэнь эйдензэ якасть минек масторганть, лексесть минек коштсонть, вастневсть минек раськень ломантнень марто.

Истя.  Лашмав сакшнось Александр Александрович Пушкингак, поэтэнть покш церазо. Сон пек ладясь Мариянь  марто.  Сынст вейсэнь кортнематне пачтясть эйсэст эйкакшпингев, тетянь-авань кудов. Александр Александрович пингензэ перть ульнесь военнойкс , служась гусаронь полксо,  полковникель. Рунгозо виде, мезень кувалт редяви виевчизэ.   Кодамо эйсэнзэ мазычи ды превейчи! Варштавкссонзо – оймень покш сюпавчи – весе тень несынек порттретстэнзэ, конань сермадызе Ф.В.Сычков.

Ковылкина станциясь васняяк кандсь Арапово лементь, тия ютавтозель кевейкееце пингестэ минек енксонь васенце чугункань кись. Иван Андреевич Арапов путсь ламо вий те кинть ветямга. Араповтнень усадьбаст ней – те вейке кудо, косо панжозь лецямо тарка.

Санкт-Петербургсо течи Эри Александра Петровнань нуцьканзо церазо – Александр Павлович Арапов. Сон инженер. Александр Павлович пек вадрясто содасы эсензэ раськензэ, генеологиянзо. Кирди кеме сюлмот Ковылкинань музеень сотрудниктнень марто.   

      Г. П.Евстигнева ,

А.Полежаевень музеень научной сотрудникесь.

«Вайгель»