Минень-сюнонь тамгамтненень, клейматненень, знаменатненень, метатненень (рузонь тевень ветицятнень коряс), пазаватненень, тешкстнэнень, сёрматненень ды лия идеограмматненень минек раськень ломантне пшкалесть весе эрямопингест перть. Неть чешкстнэнь (знактнень) ундоксост сюлмавозь хозяйствань-экономикань ды обществань сеть сюлмавкстнэнь марто, конат ладявсть-кемекставсть ламо пингень перть. Сокиень-видиень хозяйствасо ламодояк ламо тевень ветямось ды эсь юткова сынст явомась, тевс эрьва кодамо кедьёнксонь ды лездамопелень нолдамось ды сайнемась вешсть ломантнень пельде эрьва мезенть тешкстамс башка чешкссэ. Кудоютконь ды кардазъютконь предметтнэде, оршамопельде, нешке кудодо (бортте) башка, неть чешкстнэ путневсть ламо лия-мезе лангскак, сынст вельде невтевсь, кинь те виресь, паксясь, лугась. Ламо пингень перть ломантне пшкалесть чешкстнэнень канонь-буень тешкстамонть ды ванстоманть кисэ, седе мейле — семиянь ули-паронь невтеманть, истя жо кодамояк содамочинь, кулянь ванстоманть ды седе тов пачтямонть кисэ.

 

Эрзянь-мокшонь чешкстнэнь чачомась ды якамось васенцекс явовтынзе ХVII-це пингень тевень ветицятнень Д. Пушечниковонь ды А. Костяевень мелест. ХIХ–ХХ-це пингетнестэ сынст эйсэ тонавтнесть В.Н. Майнов, Н.Н. Харузин, П.Ф. Степанов, Б.П. Темногрудов ды зярыя лия исследовательтне.

В.Н. Майнов, кона редякшнось малав 150 «сьормат» (видестэ, нама, сёрмадома «сёрмат»), тешкстась: чешкстнэ, марят, вастневсть эрзятнень ды мокшотнень эрямосост «пек келейстэ, сынь путневсть весе предметтнэнь лангс, зярдо бажасть невтемс, кие лангсост азорось». Алкукс жо тевесь аштесь аламодо лиякс.

Минек ванкшноматне невтизь: седе сеедьстэ ули-паронь неть чешкстнэ путневсть сеть предметтнэнь лангс, конат «яксесть» эсь роднятнень-раськетнень ды шабратнень ютксо. Те — кудоютконь кедьёнкст, понань кемень кевердемс лездамопельть, капстань тапамс очкот, човарт-петькельть, оень пивтем-парть, пакарть, рубельть, валёкт, верьга оршамопельть, плотникень важодемапельть, лишмень панстт-ашкот. Ансяк, кода тешкстызь седе мейлень исследовательтне Н.Н. Харузин ды, сехте пек, П.Д. Степанов, чешкстнэде ков седе ламольть, В.Н. Майновнень весе эзть ловово. Ули-паронь тешкстнэнь эрявиксчист невтсь вана мезесь: зярдо цёрась явиль тетянзо эйстэ ды ушодыль эсензэ тев, сонензэ эрявсь кочкамс лия тешкс: авольть уле меньгак путлявомат. «Тень пингстэ буесэ сех покшось сайни тетянзо «сьорманть» апак полавтне, —сёрмадсь В.Н. Майнов «Очерки юридического быта мордвы» книгасонзо (СПб, 1885), — лиятне полавтнесызь эсь ладсо», ансяк ялатеке эрьвась бажи ванстомс эйсэнзэ прявт чешксэнть марто сюлмавоманзо. Тень кувалма В.Н. Майнов пачтясь вана мезе: «Весе Кузнецовтнень кедьсэ улемстэ монень савкшнось неемс «тсьотмар» (цётмар э., м. — В.Р.) чешкс, ансяк сон эли кавонзавкшныль, эли велявтовиль лия ёнов». Минь ловтано, чешкстнэ полавтневсть кода мелест, «чарасть» эсь перькаст, «пракшность» трокс-трокс ды истя седе тов. В.Н. Майнов сёрмады «кафта пантт» («кавто пандт») чешкстэнтькак. Сонзэ азорокс, келя, ульнесь Горкин, кона чачсь-кассь «гора» чешксэнь кандтниця семиясо.

Пятаевтнень буень чешксэнть полавтневемадо В.Н. Майнов сёрмадсь истя: «Мон муинь кочкарянь «пильге кедь» тешкс, кона кавксть черькстазь кувалт».

Эрзянь ды мокшонь сокий ломаненть аволь ансяк сонсензэ ульнесь чешксэзэ; сон макснесь эсь тешксэнть эйкакшонстэньгак (цёранстэнь эли тейтеренстэнь). Зярдо тетянть ули-паронь чешксэнзэ алов теевильть стядо кавто черькст, те ульнесь цёранть чешксэзэ; зярдо вельтявкске марто колмо черькст —тейтеренть. Венчазь тейтерь-
аванть чешксэзэ седе сеедьстэ ульнесь мирденть чешксэнзэ кондямокс, ансяк алганзо ютавтовиль «покрышка» кикс. Сон невтиль: те предметэсь — истямо чешксэнь кандтниця семиясто тейтерьавань.

Эрзянь ды мокшонь межа тешкстнэнь ютксо вастневсть истят, конат тенст пек эзть ладя, мерят аволь сынсткак ульнесть. Вейкесь эйстэст истямоль: мода уматнень юткс путнесть кев, конань алов кавонест шабратне кайсесть эсь каштомсто куловт ды кирьпецьстэ керязь чешксэст». Истямо ладсо сынь, нать, бажасть ванстомс пряст вейке-вейке марто межань кисэ сёвноматнеде ды седеяк пек — эрьвейкень модань нельгемадо, мезенть кисэ кирьпець лангс чешкстнэ керсевсть ознома ды мунямо марто. Тень пингстэ В.Н. Майнов эзь путне эсензэ икелев тев тонавтнемс, косто саевсть эрзянь ды мокшонь чешкстнэ. Сон бажась ансяк исковамс, кодамо ладсо цётасть сокийтне эсь ули-парост, тень ютксо модасткак, мезенть кувалма эрьвась эйстэст свал содась, мезесь  сонзэ, мезесь аволь, ды те лездась семиясо ды обществасо эрявикс лувонь-ладонь кирдемантень. «Знамена мордвы в ХVI–ХVII вв.» книгасонзо (М., 1900) межань тешкстнэнь лангс явсь мель Н.Н. Харузингак. Виде, сонзэ редявкстнэ лиятальть. Вана эйстэст вейкесь: «Эсь уманзо сокамодо мейле эрьва семиясь меельцекс соказь тешкстылизе лангозонзо эсь уличинь чешксэнтькак». Истямо ладсо, чешкстнэнь ды сынст парцунтнэнь явовомаст ды а вейкетьстэ путнемаст лангс апак вано, весе сынь топавтсть вейке тев — невтсть, кинь те ули-парось. Межа чешксэнь путнемасо явовкстнэ толковавить велетнень эрямосо а вейкеть койтнесэ, а вейкеть обрядтнэсэ, моданть мельга лиякс-лиякс якамосо ды истя седе тов.

Кой-кона чешкстнэнь нев-
темстэ В.Н. Майнов толкови смустесткак. Мертяно, киштезь ладсо молиця киксэсь невти ведь ланго, алов мендязь киксэсь — венч, прямоугольникесь — кудо. В.Н. Майнов макссь чипаень, ломанень, лишмень, букань, нармунень, каргонь, нумолонь пильгень, каргонь пильгень ды лия невтевкст. Неть чешкстнэнь учёноесь саинзе аволь превстэ. Сынст тешкстызь ды толковизь тензэ азорост. Эсь чешкссэнть сынь норовасть аволь ансяк седе видестэ невтемс предметэнть, ульнесть, нама, корязонзо лия арсемасткак. Ней, зярдо неть чартявкстнэ ёмавтызь васень смустест, семантикаст чарькодемс а шожда.

Арсеманок коряс, ламо идеоматне саизь ундоксост неолитэнь шкастонть. Самай сестэ кезэрень искусствась кармась полавтовомо, саеме од ёнкст. Артомань парцунось аламонь-аламонь ёмавтсы образонь ёнксонзо, артовксось (рисункась) аламонь-аламонь тееви чешксэкс, келейстэ кармить вастневеме кирьксэнь, крёстонь, спиралень, свастикань, пельковонь ды тештень лия чартявкстнэ, ломанень, ракшань, канонь-буень тотемень, оциницянь тешксэнь, идолонь, аволь стака арцтонь невтевкст. Сыместэ сымес пачтневсть преданиясо эрямодонть канонь-буень чарькодематне ды вейсэнь вийсэ теезь художествань образтнэ, конатнестэ эрьвась невтсь пертьпельксэнть лангс мифологиянь, религиянь ды лия вановтт. Эйстэст аволь аламотне мусть невтема чартявкссо-идео-
граммасо, конат алтазь а шожда чарькодемань ды мелень-арсемань ёвтамо, сы шкань сыметненень сынст пачтямо.

Седе ламо идеограмматне пачкодсть тенек ломанень ули-паронь чешксэкс. Кезэрень шкатнестэ неть чешкстнэ, секень вант, кандсть религиянь-мунямонь смусть, ули-паро эзть невте. Пикась, сялгось, налось ульнесть кезэрь пингень ломаненть эрямонь аявовикс пельксэкс, сынст эйстэ аштесь парсте оцинямось, лисни — канонть-буенть паро эрямозояк. Секс лангозост тейневстькак тешкст, конатнень, кезэрень эрзятнень ды мокшотнень арсемаст коряс, ульнесть мунямонь виест, сынь лездасть оцинямсто. Нама, неть кемевтематнень каршо кияк, паряк, мери: вельть уш васолдо вешневить неть чешкстнэнь юрост.

Содазь, эрзянь ды мокшонь материянь ды духовной культурань кой-кона пелькстнэ ютнесть сыместэ сымес апак полавтневе. Кодамокс ульнесть, истямокс, ловт, кадновстькак. Тень кувалма сат мельс: кезэрень культурань неть пелькстнэ, тень ютксо чешкстнэяк, ванстовсть седе мейлень шкатнестэяк, бути теевстькак эйсэст кодаткак лиякстомат — пек аламо. Теде кортыть зярыя чешкстнэ, конат сёрмадозь ХVII-це пингень конёвтнесэ. Сестэ рузтнэнь марто эрямонь-аштемань ды культурань сюлмавкстнэ ансяк кармасть кемекставомо, ды рузыямо эзь неяво. Седе ламо эрзятне ды мокшотне кадновсть православиянь церькованть эйстэ ве ёно, эрясть ды озность язычествань койтнесэ. Модань соксеманть-виднеманть ды ракша мельга якамонть марто эзть стувтне кезэрень тевдесткак: таргасть медь, кундсесть калт, яксесть оцинямо. Эрямост ладясть-ветясть тонадовозь койтнень коряс, мезде кортыть ХVII-це пингень конёвтнесэ ванстовозь лемтне: «свиное логово», «бобровая вежа», «бобровые гоны», «козиное стойло», «лосиное стойло». Весе те кармавты арсеме: кезэрь шкань кемемань-мунямонь вановттнэ ды тевень ветямонь парцунтнэ вадрясто-парсте цётавсть неолитэнь шкань ламо чартявкстнэс ды идеограмматнес, зярдо, кода меринек уш, эрямосонть пек редявиксэль чешксэнть тарказо. Аламонь-аламонь канонь-буень чешкстнэ-ванстыцятне тейневсть ломантнень ули-паронь тешксэкс. Минек койсэ, эряви лоткамс ловомодо, буто кезэрень шкасто ульнесть ули-паронь ансяк вейсэнь (обществань) парцунт. Истя лововсь кувать. А эряви стувтнемс: те шкась пек кувакаль, сон эзь аште таркасонзо, апак лотксе мольсь икелев, полавтневсь, кассь-кемекстась. Сонзэ марто вейсэ полавтневсь аволь ансяк сонсь ломанесь, ули-паронть лангс вановтонзояк. Эсь ули-паронть марто кезэрень оциницясь, калонь кундыцясь зярдояк эзь явно, сон свал мартонзоль. Канонь-буень ули-паро, нама, ульнесь, ансяк тень пингстэ ульнесь башка ломанень ули-парояк: тюремапельть, кудоютконь кедьёнкст, кой-мезе лияяк. Эрьва ломанесь путнесь лангозонзо эсь чешксэнзэ. Тенень кемевтить Н.Н. Харузинэнь валонзояк. Сон кевкстнесь: «Каня арасельть тосо эсь ули-паронь пелькст: сялгот, пикат, налт ды лият, конат ульнесть эрямонь аявовикс пельксэкс, оцинямос анокстамсто озновкшновсть, пувсевсть качамосо?». Неть кедьёнкстнэ пек питнеельть, мельспутовицяльть. Те сень кувалма, мекс эйстэст аштесь паро оцинямось, тень вельде — вачо пекень асодамоськак. Секс лангозост тейневстькак тешкст, чартявкст, аволь стака арцтт, конатнень, кезэрь шкань оциницятнень кемемаст коряс, ульнесть мунямонь виест, кона, марят, лезды оцинямосо. Тень кувалма саеви мельс озкс тумодо Н.Н. Харузинэнь ледстнемазояк. Кортамось моли Нижней Новгородонь губерниянь Сергачонь уездэнь Пьяна леенть чиресэ Чукало велень тумодонть, конань ало ютавтневсть озкст, мезенть кувалма «на стволе его вырезано много клейм, очевидно, мордовских, сделанных в отдалённую старину».

Озксчитнестэ пазчангонь чешксэнь таркас тешксэнь (метань) сайнеманть лангс невти вана теяк: Мордовиянь зярыя велетнесэ тешкс/тяште валонть таркас («чешксэнь» смустьсэ) сайнесть пазава валонть. Теяк савты мельс: эрямопингень ве шкастонть чешкстнэ чачнить язычествань культонь чартявксокс. Чешкстнэнь чачома шкадост кортамсто, эряви тешкстамс: сехте кезэренсетне эйстэст —идеограмматне, конат сёрмалевсть ритуалонь предметтнэнь, калмолангсо памятниктнень, седе мейле — крёсттнэнь лангс, мезесь вастневсь натой ХХ-це пингень 80-це иетнень видьс. (Христианствадо икеле крёстонть таркас путневсь сюров чувто/сюру шуфта.) Тестэ таго редяви канонь-буень неть чартявкстнэнь религиянь-мунямонь смустест. Неть чартявкстнэстэ эрьвась невтсь, кинь те крёстось. Тень пингстэ прок кортась: «илямак токше», ды истямо ладсо ванстась кулозенть пингеде пингес удоманзо.

Явовты мель Т.П. Прокинань арсемазо. Сон лови: крёсттнэнь лангс чешксэнь тееманть вельде ломантне цётасть кулозенть ды сонзэ буенть мельга те моданть. Ды смустень коряс те тевесь а явови мода паень явшеманть ды межа чешксэнь (ума черьксэнь/ума тяштень) тееманть эйстэ.

Аламодо седе мейле чачсть эрзянь ды мокшонь сеть тешкс-
тнэ, конатнень учёнойтне лемдизь бортень чешксэкс (знаменакс). Сынст вельде эрьва кудораськесь бажась явомс эсь борттнень лиянь борттнень эйстэ ды ванстомс норовост. Ламо ёнксов хозяйствань ладявомась, тевень (ремеслань) ламолгадомась вешсть кемекстамс эрьва предметэнть башка семия мельга. Те шкане чешксэнь куронть (системанть) кастомантень лездасть уш аволь религиянь-мунямонь лувтне (мотивтне); сынь нежедсть ней эрзянь-мокшонь обществасонть од сюлмавкстнэнь лангс, конат лиснесть ули-паронть лангс лиякс ваномо кармамонть эйстэ. Паряк, самай тень юрсо кемекставить эрьва чинь эрямонть туртов чешкстнэ: декорациянь-прикладной искусствань идеограмматне, арифметикань цифрань системась, пикто-
графиянь сёрмась^.

Те шкастонть чешкстнэ пек седе ламолгадыть. Арсеви, улипаронь чешкстнэ — те ансяк а покш пелькске се сюпав куростонть, конань теить религиянь, эрямонь-аштемань, информациянь-кодификациянь чартявкстнэ.

Эрзянь ды мокшонь эпикань моротнесэ, конат чачсть феодалонь-классонь сюлмавкстнэнь ладямо шкасто, пачтяви те раськенть сёрманзо улемадо:

 

Ашти Тюштя покш нупальсэ,

Ашти озадо эземсэ.

Тумонь нардев морга экшсэ

Тешксты сёрмат тиринь кельсэ.

 

Те корты вана мезде: эрзятнень марто мокшотнень сёрмаст чачсь пек кезэрень шкане. Те ульнесть минень-сюнонь кикст ды черькст. Кодатольть Тюштянь «сёрматне» — тень чарькодемс лездыть пиктографиясо ды идеографиясо эрзянь-мокшонь сёрмадовкстнэ.

Неень коряс чешкстнэ седе эрявсть. Сынь вастневстькак седе сеедьстэ, смустеськак, кона сюлмавсь мартост, седе келеель. Течи сынь «ламо таркасо ванстовсть кезэрь шкадонть ледстнемакс ды эрить ансяк секс, мекс уличинь лия чешкссэ сынст а кода полавтомс», — сёрмадсь Н.Н. Харузин XIX—XX-це пингетнень ютксо. Ловномо ды сёрмадомо эрзятнень ды мокшотнень амаштомаст кувалма (нама, неень шкань чарькодемасо) неть сёрматне лездасть раськень ломантненень кирдемс вейкест-вейкест марто сюлмавкст, полавтнесть кедьтешксэст. Истямо ладсо вастневить «энялдома конёвтнесэ, конат максневсть Московонь правительствантень эсь мелявкстнэнь кувалма, путневсть документтнэнь лангс, конат сюлмавсть мода межатнень марто, зярдо инородецтнэ эрсесть понятойкс эли свидетелькс, каземань сёрмадовкстнэсэ».

Течис ванстовсть сёрмасо кулянь пачтямо чешксэкс идеограммань сайнемадо кемевтемат. Этнографтнень ютксо вадрясто содасызь «Никита Колесников солдатонтень сёрманть», конань ХIХ-це пингенть прядовомсто кучизь тензэ Саратовань губерниянь Кузнецкоень уездсэ эриця раськень ломанензэ.

Эрзянь пиктографиянь те сёрмасонть кортави вана мезде: Никитань Фёдор ялаксозо, конань ульнесь семиянь «пелюма» чешксэзэ ды эсензэ сёрмадомапелезэ, кудов велявтомадо мейле колмо чинь ютазь кулось; козяйказо аварди, колмо эйкакшонзо майсить кшивтеме, энялдыть Никитанень кучомс ярмакт; теде башка, пачтяви Пётр Колесниковонь экшс Никитань племянницанть Каргонь лисемадо. Те сёрмась явовты мель вана мезень кувалма: эрзятнень марто мокшотне, конат кувать лововсть сёрмас а содыцякс, оштё тёжа ды седе ламо иеде икеле васоло таркав куляст пачтясть кедьсёрмадовксонь истямо чешкс вельде, конат раськесэнть вадрясто содавиксэльть. Секс сёрмань кучицясь, нама, эзь кавтолдо: Никита «чарькодьсы сонзэ кода эряви, истят эйсэнзэ чешкстнэ чарькодевицяльть». Те кармавты кортамо эрзянь-мокшонь раськенть кезэрень сёрмадома лувонзо улемадо. Лемезэ — пиктографиянь сёрма.

Эрзянь-мокшонь кезэрень сёрмань улемантень «Эрзянь кезэрень пингень содамотешкстнэ» важодевкссэнзэ (Эрзянь правда. — 2001. — Февралень 6-це чи) кемевти В.И. Кирилловгак, кона ванкшнось-тонавтнесь чешксэнь семантиканть. Нама, тесэ кортамось моли аволь слогсо сёрмадо — рисовавкссо, образсо эрицядо. Тешкстасынек вана теньгак: эрзянь ды мокшонь кельтнесэ весе валтнэ, конат сюлмавозь сёрмадомадо ды ловномадо чарькодематнень марто, —эсенек: эрз. тешкс, мокш. тяште, тяшкс, эрз., мокш. сёрма, эрз. сёрмадомс, мокш. сёрмадомс, тяштемс; эрз. ловномс, мокш. морафтомс. Весе те корты: эрзятнень марто мокшотнень сёрмаст ульнесь, ды ульнесь, нать, а берянь, бути сонзэ вельде ломантне кирдсть вейкест-вейкест марто сюлмот масторонь келес.

Эрзятнень ды мокшотнень кезэрень сёрмадост чарькодема максыть пиктографиянь ды идеографиянь тешкстнэ, конат ванстовсть кудоютконь кой-кона пелькстнэнь лангсо (мертяно, одирьванть ули-паронзо марто паренть лангсо). Мазылгавтомань кисэ сайнемадост башка, сынь «топавтсть лия тевгак: невтсть эрямосо лиякстоматнень, хозяйствань тевтнень лангс, правань ды кемемань-мунямонь вановттнэнь».

Алфавиттэ икеле эрзянь ды мокшонь сёрманть вадря невтевксэкс аштить тешкстнэ, конат путневсть биркас, стадаваныень ды каявксонь пурныцянь мандо лангс. Сынст эйсэ невтевсь сокийтнень-видийтнень эрямост-аштемаст. Биркатнень лангсо семиянь чешкссэ ды пиктографиянь чартявкссо сёрмалевсть кудонь-кардазонь азортнэ (семиянь прявтонть лемезэ, тетялемезэ), цёратне ды тейтерьаватне, ракшатне, модатне ды видневиця паксятне, каявкстнэ (ки лангсо зяро ульнесь). Эрзятнень марто мокшотне тешкссэ ловсть цёратнень, точкасо — тейтерьаватнень. Чешксэнь истямо ладсо ветямось лездась ломантненень кирдемс мандо лангсо эрьва кодат содамочить. Сон, те ветямось, лововсь сестэ масторлангсо сех вадрякс. ХVII–ХVIII-це пингетнестэ эрзянь-мокшонь пиктографиянь сёрмась аламонь-аламонь полавтозель рузонь алфавитсэ.

Мордовиянь Кочкуровань райононь Вирь ало Тавла велесэ те шкас ванстовсть цифрасо невтематне.

Революциядо икелень Россиясо парсте ладязь тевень ветямонть кувалма миненек пачкодсть Сибирень, Уралонь ды Равчирень раськетнень ламо чешксэст. Истя, «Тамги» народов Сибири ХVII в.» книгасонзо (М., 1965) Ю.Б. Симченко тешксты, келя, «чешксэнь васенце тонавтницякс ульнесть рузонь администрациянь приказной ломантне, конатненень эрявсть содамочить эрьва тамгадонть. Сынь ульнесть истят: валонь максомань (клятвань), канонь-буень, ясаконь ды лият. Неть содамочитне таштавсть истямо ладсо: «…ясаконь пурныцятне видьстэ тевест теемстэ кевкстнесть эрицятнень тамгатнень смусттест. Чешксэнть смустензэ исковамодо мейле сынь сёрмадылизь конёв лангс. Сынсь сайнесть лангстост копияткак». Истямо ладсо исковазельть-сёрмадозельть чешкстнэяк, конат совасть историктнень ютксо содавикс важодевксэнтень — «Книга письма и меры Д. Пушечникова и А. Костяева». Уличинь чешкс-
тнэ невтить мариецтнэнь ды эрзятнень-мокшотнень малавиксчист. Истя, кавонест раськень тамгатне ды тешкстнэ (знаменатне) «явовить схематичностьсэ, условностьсэ, видестэ молиця ды эрьва кодамо ужинень теиця черькссэ…», — сёрмады Г.Н. Айплатов «Нижегородские документы ХVI века (1588–1600 гг.)» важодевкссэнзэ (М., 1977). Теде башка, вастневить кирькст, чирькеть, чирь ды киштезь-киштезь молиця кикст, вишка кирькскеть. Равчирень финнтнэнь чешкссэст чуросто эрсить предметт, пертьпельксэнь невтевкст, ракшат. Эрзятнень-мокшотнень ды мариецтнэнь чешксэст хантытнень ды манситнень чешксэст марто ванкшномсто редяви: меельцетне «кандтнесть сюжетэнь ёнкс, сатышкасто кемевиксстэ невтсть ракшат, пертьпельксэнь предметт», — полады Г. Айплатов. Те сестэ, зярдо «эрзянь-мокшонь чешкстнэ седе сеедьстэ теезь вейке койсэ, теемаст шождалгавтозь, стилистикаст коряс вейкеть».

Истят чешкстнэ вастневить минек ёнкссо эриця рузтнэнь ютксояк. Тамгань кондямо тешкстнэ келейстэ якасть шабра чуваштнэнь юткова.

Сёрмасо вастневиця эрзянь-мокшонь, чилисемаёнксонь финнэнь, тюркань, рузонь чешкстнэнь, пиктографиянь ды идеографиянь рисовавкстнэнь ды Европань кой-кона раськетнень алфавитсэ тешкстнэнь ванкшномсто редясак: сынь ламосо малавикст.

Теке мазысь свадьбань ды кенярксчинь оршамопельтнень ды одирьванть ули-паронзо туртов паренть лангсо чешкстнэнь ды арцттнэнь мартояк.

Семиянь чешкстнэде кевкстемась аволь шождатнестэ. Сон, минек койсэ, кеместэ сюлмавозь кезэрень искусствань эрьва кодат ёнкстнэнь марто. Декоративно-прикладной искусствасо эрзянь ды мокшонь арцттнэ а беряньстэ ванкшнозь А.О. Гейкелень, В.Н. Мартьяновонь, Т.А. Крюковань важодевкстнэсэ (чешксэнь ды арцтонь сюлмавкстнэ). Ялатеке художествань шкинемань те ёнксонь тонавтнемантень явови а сатышка мель. Ды те сестэ, зярдо сон алтни мелень витиця ламо од панжовкст.

Апак кавтолдо эряви меремс: финнэнь-угрань ламо раськень чешкстнэ, сынст лувтне (мотивтне), юрсост теезь
арцттнэ видьстэ невтсть, костонь тейтерьавась, кодамо буень эли велень.

Течи раськетнень культурасост, народонь искусствасонть кезэрень ламо ёнкстнэнь-пелькстнэнь, велетнесэ икелень-бувалань оршамопельтнень ёмавтомаст кувалма стака чарькодемс, мейсэ явовсть неть оршамопельтне, ды аволь ансяк васолга эриця ве раськень ломантнень — маласотненьгак. Тень кувалма савкшны ансяк ацирьгалемс ды кеняркшномс Н. Гаген-Торнонь кисэ, кона ХХ-це пингень 20-це иетнестэ несь истямо тев: «Икелень Пензань губерниянь Рузаевка велесэ… эрицятне апак кавтолдо ёвтылизь, кодамо велестэ те эли тона тейтерьавась. Сынь содылизь тень аванть пряспутомканзо, оршамосонзо викшневкстнэнь тюсост-таркаст коряс», — сёрмады сон «Женская одежда народов Поволжья» книгасонзо (Чебоксары, 1960). Теке учёноенть валонзо коряс, викшневкстнэнь таркаст, аравтнемаст «невтсть ломаненть раськензэ ды эрямо тарканзо».

«Декоративно-прикладное искусство народов Коми» книгасонзо (М., 1980) текеде корты Л.С. Грибова: «Сыре ломантне зярс эзизь стувто ды сеске явсызь эсь райононь вещанть лиянсенть эйстэ. Мертяно, Вере Вычегдань эрицятне (сынь эрить Вычегда леенть чудильманзо — Вишера леенть чирева) сеске ёвтасызь тенк, кона викшневкстнэ-кодавкстнэ сынст, конатне — Локчимень эрицятнень (Локчим леесь — Вычегданть лия чудильмазо). Теде башка, лиясто явовкстнэ редявкшныть мик шабра велень арцттнэнь-мезтнень ютксо». Те корты викшневксэнь а полавтневемадонть ды сех кезэрень пельксэнзэ — канонь-буень чешкстнэнь марто — кеместэ сюлмавомадонзо.

Секень вант, чешкстнэнь вельде кемемань-мунямонь смусть путсть эсест викшневкстнэс эрзянь тейтерьаватнеяк. Те секс, мекс кезэрь шкане лововсь: викшневкстнэ ванстыть ломаненть тоначинь вийтнеде, апаро сельмеде. Теде башка, оршамопельсэ чешкстнэ, викшневкстнэ-арцттнэ сюлмасть ломаненть Мода лангсо эриця буензэ марто (неть чешкстнэ лездасть эсь буень ломаненть содамо ды, зярдо эрявсь, кисэнзэ стямо) ды сонзэ а неявиця пельксэнть — тоначисэ эриця атятнень-сэрдятнень марто (неть чешкстнэ тердьсызь сынст ды лездыть тоначинь апаро вийтнеде прянь ванстомо).

Ломанесь, содазь, якшамодо-кельмемадо бажи седе вадрясто пекстнемс кудо кенкшензэ, лембестэ оршнемс. Истя сон тейни минень-сюнонь зыяндо — неявикстэяк, анеявикстэяк — прянзо ванстоманть кисэ. Учёнойтне тешкстыть: ведунтнэ ды эретниктне сех покш мель явсть кудотнесэ весе варятненень. Те секс, мекс самай сынст эзга совсить кудос апаро вийтне. Бути сынст эйстэ прянзо ванстоманть кисэ христианось артни вальманзо ды кенкшензэ краскасо, язычникесь тейнесь тень оршамопельсэнзэ чешкстнэнь вельде.

Тоначинь вийтнес кемиця ломантне ловсть: весе берянденть сех пек эряви ванстомс одирьватнень, мирденень лисема лангсо тейтертнень, секскак сынст оршамост вельтявкшность ванстомань эрьва кодамо чартявкссо, арцтсо, канонь-буень чешкссэ. Кудо варянь пекстницятнень-потлицятнень ладсо, викшницятне башка мель явсть пов варятненень. Те секс, марят, мекс самай сынст эзга тоначинь апаро вийтне эцнить потс. Тень кувалма аволь ансяк пов варятнень, оршамопелень весе алкстнэнь, ставкстнэнь, петнень, ожатнень, сиветнень эрзянь ды мокшонь викшницятне вельтясть ванстыця чешкссэ, конат, марят, тандавтсызь берянь вийтнень.

Эрзянь ды мокшонь тейтерьавань свадьбань оршамопельсэст сех пек викшнекшнесть сеть таркатнень, конат кекшсть лавтовтнень, кирьганть, мештенть. Теке мазысь Равчирень кой-кона лия раськетнень викшневкссэсткак. Теде башка, ромбсо ды уголсо тешкставкшность кутьмере ловажатне. Эрьва кодамо чешкссэ-викшневкссэ пек сюпавсто вельтневкшнесть эрзянь ды мокшонь одирьвань пряспутомкатне. Ламо чешксэст-чартявксост улить Равчирень лия раськетненьгак, мертяно, чуваштнэнь. Явовты мель чувашавань кеске панарось. Меште лангсто сон кавто ёнга викшнезь кавксо пе марто цецякс келемтезь тештесэ.

Модамасторонь сех мазый оршамопельтнестэ вейкесь — эрзянь одирьвань покаесь. Мештень куншкавидьс сон весе копачазь викшневкссэ. Тесэ — крёстт, ромбт, треугольникть, панжозь цецят ды ламо лият-мезть. Тень пингстэ эряви меремс: истяк чистэ якамонь оршамопельтнень коряс покшчинь ды свадьбань оршамопельтне лиятальть, нама, ков седе мазыельть.

Эрзянь ды мокшонь фольклорсонть улить морот, конатнесэ шнавить чешкссэ викшнезь палятнень мазычист:

 

Мазы ялган кепететсть,

Ашо дигань полкокс сынь сыргасть.

Котова таргазь сынст паляст,

Клетка марто сынст руцяст.

 

Эрзянь ды мокшонь свадьбасонть ульнесь кой невтнемс одирьвань ули-паронть (приданоенть) сонзэ ве ялгантень. Лиясто тона ванкшнось те ули-паростонть пацятнень-оршамкатнень эсензэ сэрьга аравтнезь. Тень пингстэ моравиця моросонть невтневсть оршамопелень пелькстнэ, шнавсть викшневкстнэнь, чешкстнэнь, арцттнэнь мазычист:

 

Ней оршика, ялгакай,

Викшнезь кумаць-панарот.

Мейле оршик, ялгакай,

Цитни викшневкс панарот.

Ней оршика, дугакай,

Сехте мазый панарот,

Колмо суронь келесэнть.

Мазый викшневкст кутьмерезэ,

Арцтке потсо икельксэзэ,

Килей лопат лавтовонзо,

Валскень тештть пекебоканзо.

Кой-кона учёнойтне терявтнить исковамс: мезесь васенцель — чешксэсь эли арцтось-викшневксэсь?

Викшнемань искусстванть касомазо невти: чешкстнэ чачсть седе икеле, сынь васенцеть. Викшневкссэ оршамопелест вельтямо ломантне кармасть ансяк минек эрань омбоце тёжтиень васенце пельксстэнть. Секскак а манявтано, мериндерятано: самай сёрматнень юрсо тейтерьаватне тейнесть эсь викшневкстнэнь, арцттнэнь. Теде кортыть сынст лувонь (мотивень) лемтнеяк. Викшнемадо башка, чешксэнь лемтне вастневить декоративно-прикладной искусствань лия ёнкстнэсэяк: човалянь керьксамосо, чувто ланга керсемасо, ювелирэнь искусствасо.

Кудораськень чешкстнэде истя ламо, декоративно-прикладной искусствасонть сынь вастневить истя келейстэ — вейке статьясо весе те а невтеви. Секскак, икеле ёвтазденть башка, минь терявттано невтемс ансяк чувто ланга керсеманть эрямонзо. Ды тейсынек тень одирьвань ули-паронь ванстома паренть ванкшноманзо вельде.

Эрзянь-мокшонь декоративно-прикладной искусствасонть аволь вишкине тарка сайсть лувтне (мотивтне), конат сюлмавозельть ломаненть эрямосо покшчинть —свадьбанть марто. Сонзэ эйсэ вастневсть эрьва кодат кедьёнкст ды лездамопельть. Сынст ютксто васняяк явовсь одирьвань ули-паронть (приданоенть) туртов паресь. Сонзэ тейнилизь свадьбанень одирьванть тетязо эли лелязо, кой-кона таркатнесэ (Саранскоень уездсэ) свадьбадо икеле рамилизе атявтось.

Паресь седе сеедьстэ тейневсь пекшестэ, сэрезэль 60–90 сантиметрат, келезэль — 40–70. Умбодылизь ундов пекшестэ (чувтосто, конань эрзятне ды мокшотне ловсть «ваньксэкс»), стенанзо эчкест ульнесть 1–4 сантиметрат.

Кудоютконь весе ули-паротнестэ паресь мазылгавтневсь сехте пек. Лововсь, эсензэ паренть марто тейтересь саи аволь ансяк тиринь кудосо паро эрямодонть ледстнеманзо, тейтерь-
авань икелепелень уцясканзояк.

Тестэ чарькодеви, мекс истя ёжомарязь, мунямонь весе койтнень ванстозь путневсь парентень одирьванть ули-парозо.

Седе сеедьстэ те тейневсь кудыкеле. Кудосо пурнамс паренть эзь мереве. Эрзятне ды мокшотне ловсть: «кавто мода ютксо» пурнавкшныть-сэрнявкшныть ансяк уловтне. Бути истя теемс эрийтнень марто — сынь а улить эрицякс, лиякс меремс, семиясо эрямост а лиси.

Кода ритуалонь кедьёнкс паресь вельтявкшнось тенень ладиця сёрмасо, канонь-буень тешкссэ, викшневкссэ, арцтсо, конатнень вельде одтнэнень арсевсь семиясо уцяскав эрямо.

Кой-кона партнень вельтявксост лангс тешкстневсть кавто чешкст, уцяскань кавто рисьметь — цёрань ды авань. Сынь ушодовильть шабрацек молиця кавто виде киксстэ. Аламо таркань ютазь кармильть менчевеме, мейле таго видемильть ды прядовильть налонь кондямо песэ. Цёрань рисьмесь сезевиль васенцекс, авансесь венстевиль, ловт, вельтявксонть чирес.

Эсь ванкшноматнень юрсо минь сынек истямо мельс: кезэрень чешкссэ паренть недямось кандсь мунямонь смусть, кона кеместэ сюлмазель свадьбань лувтнень марто. Неть чешкстнэсэ одтнэнень арсевсь семиянь эрямосо, кудоютконь ды паксянь тевтнень ветямосо чансть, кеняркс.

Шаршавонь (кружевань) арцттнэ, валанясто сынст ветямось, вадрясто ладсемась тешкстасть семиянь эрямонть ламо ёнксонзо ды смустензэ. Секс чарькодеви эсь уцяскань ванстомапеленть — эрямо паренть лангс — тейтеренть китордозь ды кемезь ваномазо. Те паренть лангсо минень-сюнонь чешкстнэ арсесть тензэ вадрят-парт.

Берянь, мекс эрзянь ды мокшонь чешкстнэ ды викшневкстнэ те шкас паро ладсо апак ванкшно. Те лездаволь панжомс раськенть эрямосто ламо асодавикс ёнкст, седе домкасто чарькодемс кемемань-мунямонь ды мифологиянь лувтнень марто сёрматнень ды викшневкстнэнь сюлмавомаст.

Течи савкшны кортамс ансяк вана мезде: чешксэнь ды викшневксэнь лемтнесэ цётавсть ломанденть, пертьпельксэнть ды обществанть марто сонзэ сюлмавомадо, мирдэнть-мастордонть ды космостонть эрзятнень ды мокшотнень чарькодемаст.

Эрзянь ды мокшонь чешкстнэстэ, кемемань-мунямонь ды кулянь кандомадост башка, минь тешкставлинек оштё вейке лезэв ёнкс: сынь лездасть ломантнень ютксо сюлмотнень вадрялгавтомо, эрявикс лувс эрямонть совавтомо.

 

Владимир Рогачёв,

филологиянь наукань доктор