Кезэрь шкатнестэ саезь пачкодсть тенек мирэнть-масторонть теемадо мифтне. Ламо пингень перть сынь, нама, полавтовсть. Васень смустест ялатеке эзизь ёмавто, ванстызь. Теке мазысь пазтнэнь пантеононть мартояк.

Пазтнэнь тевест — ладямс-ветямс пертьпельксэнть ды обществанть эрямост. Финнэнь-угрань космогониянть коряс, сехте покш пазтнэ эрить менельсэ, седе вишкинетне — мастор лангсо. Эрзянь-мокшонь пантеононть покш пельксэнзэ саить паз-аватне. Васень таркасо ашти Анге Патяй (Чам-Пасонь тейтерезэ ды козяйказо) — мазычинь, эрямонь лисьмапрянь паз-авась.

Мифенть коряс, Анге Патяй чачсь алсто, конань лепштизе Чам-Пас. Чувто прясо колоньгемень иень перть удомадо мейле Чам-Пас сыргозсь вить пильгсэнзэ пшти сэредь-
кстэ. Сон кепедизе пильгензэ ды редясь алдонзо колазь ал. Алонть потсто лиссь сэрей, ёлганя тейтерь. Верепазонть мелензэ коряс тейтересь теевсь сонзэ козяйкакс. Те ульнесь самай Анге Патяй. Чам-Пасто мейле сон саи пантеонсонть омбоце тарканть.

Анге Патяй — паз-ава, тейтерьаватнеде, вечкемадонть, сюротнеде, семиятнеде мелявтыця, чачтыцятнень ды эйкакштнэнь шумбрачист ванстыця. П.И. Мельников-Печерский ловсь: эрзянь ды мокшонь весе пазтнэ роднят-раськеть. Истямоль мелезэ В.И. Майновоньгак. Анге Патяй эри менельсэ ды мода лангсо. Менель лангонь кудосонзо — эрямонь а амолявиця лисьмапря: зярс апак чачо ломанень ойметь, кудоютконь ды идем ракшань, тикшень-чувтонь видьметь. Алов, мастор лангов, кучни мартост ватаватнень, ды сонськак анеявиксстэ эрси эйкакшонь чачомсто. Эрьва чачозь пакшантень, ракшантень, тикшентень, чувтонтень Анге Патяй максни башка паз. Се вансты эйсэст апаро вийтнеде. Менельсэ Анге Патяй од ды мазый. Мастор лангов валгонемстэ сайни виев сырькаень чачо. Тесэ сон теке кшнинь ава: чалги мода лангс — модась алов мендяви, чалги кев лангс — пильге тешкс кады.

Лиясто Анге Патянть некшнесызь сырнень кувака пуло нармунекс, конань сырнень нерьстэнзэ паксява ды лугава певерить сюронь видьметь. Эрси ашо гулькинекскак. Лиясто кизэнь маней чикуншкане паксява нолажты эль редявикс пельнень шожда сулейне. Те — Анге Патянть сулеезэ.

Сех пек паз-авась вечксынзе тейтерьаватнень ды эйкакштнэнь. Аватненень сон лезды чачтомсто, пакшатнень вансты апародо. Масторов валгомадо мейле Анге Патяй ваны, вечкить-арась тейтерьаватне важодеме, вадрясто-аволь штердить-кодыть. Сонсь паз-авась штерди менельсэ сиянь сурсеме марто сырнень штересэ. Сёксень маней читнестэ ливтниця шанжав коцттнэ лововить сонзэ кедьтеевксэкс.

Мирэнть-масторонть теемадо мейле Анге Патяй мерсь тейтерьаватненень чистэ чачтнемс, ракшатненень ды нармунтненень — левксыякшномс ды нарвамс ципакат. Кияк эзь карма тень тееме, пек уш стака, келя, те тевесь. Ды ансяк саразось кундась паз-аванть мелензэ топавтомо. Тень кувалма теевсь сонзэ вечкевикс нармунекс. Саразонть мельга туиксэль кукоськак, ансяк курок кармась пеняцямо ды музгордеме, ды Анге Патяй кеждясь лангозонзо. Сон панизе куконть вирев, кардызе пизэнь теемадо, нар-
вамс алонзо мерсь путнемс лия нармунень пизэс. Текень пес, сонсензэяк, алонзояк теинзе сёрмавкс.

Тикшетнень эйстэ Анге Патясь сех пек вечксынзе суронть ды лияназонть. Те секс, мекс сынь максыть ламо видьметь. Сон сонсь пурны паксясто лияназонть, эрьва десятинасто вейке нетькске, ды штерди эйстэнзэ эйкакштнэнень-пазтнэнень панарокс суре. Сурекс вейте-вейте поныне ноцковтни эрьва ашо ревенть лангстояк. Мейле те штердевксэнть арты менель сэньсэ, якстере чипайсэ, ожо ковсо, галой чилисемасо ды неть тюстнэсэ викшни пазонь панартнэнь лавтовост ды алксост. Пиземечирькесь — те Инешкипазонь панаронть алксозо, конань викшнизе Анге Патяй.

Паз-авась путы мельс чурьканть марто пейнечурькантькак. Секс сынст путнить сэредиця эли беряньстэ удыця эйкакшонь тодов алов. А вана комолянть Анге Патя а вечксы. Те секс, мекс сон кассь тарадсто, конань кандызе Идемевсесь. Тень кувалма Анге Патянть лемс покшчитнестэ зярдояк эзть симне комоля лангсо якавтозь пиядо. Чувтотнестэ паз-авась весемеде пек вечксы килеенть: сон касы ды рашты бойкасто. Раштамо маштоманть кисэ путы мельс мекшентькак (саразонть марто вейкетьстэ). Мекшень штасто теевить пазтнэнь лемс кирвазтневиця штатолтнэ, медьстэ пидеви каявксонь симемапелесь — пуресь. Масторов эрямонть Анге Патяй валны-кучни росакс, пиземекс, ловокс, ёндолокс. Ёндолось сехте лезэв: сон совси Масторпазонть кудос ды максни тензэ моданть нардензэ кастнемс вийть. Анге Патянть каршо ашти чопода вийтнень Идемевсь прявтост, кона канды ломантненень апарот ды кулома. Паз-авась апак лотксе вети мартонзо тюрема, вансты эрьва теевксэнть эрямонзо ды лексеманзо.

Кой-кона учёнойтне (Н.И. Смирнов, У. Харва, М.Е. Евсевьев, К.Т. Самородов) кемевтить: истямо образ арасель овсе, сон арсезь, саезь превстэ. Лият (П.И. Мельников-Печерский, В.Н. Майнов, А.И. Маскаев, Г.А. Корнишина, Н.Г. Юрчёнкова, А.М. Шаронов) молить тень каршо. Истя, Г.А. Корнишинань валонзо коряс, истямо паз-аваст ульнесь Терюшевань эрзятнень ды черемистнэнь. Кемевтицякс марявить лиятнень мелесткак.

Кой-кона исследовательтне терявтнить сюлмамс Анге Патянь образонть Евангелия-
сто Дева Мариянь образонть марто. Ловомс истя — те а содамс ды а чарькодемс мирэнть-масторонть ды пертьпельксэнть лангс эрзятнень ды мокшотнень вановтост. Сеньгак а эряви стувтнемс: Анге Патяй — фольклоронь паз-ава, поэзиясо пертьпельксэнь шкинемань вийтнень невтиця, свал од ды мазый; Дева Мария — книгань образ, модалангонь ава.

Эрзятнень ды мокшотнень ютксо Анге Патянть беряньстэ содамозо толковави христианстванть самосо. Язычествань кемематне ладявтозельть православиянтень, христианствань Богородицась саинзе минек паз-аванть ёнксонзо. Сеньгак а эряви стувтнемс: содазь, эрзятне ды мокшотне сравтнезь пек васолга, ды тень кувалма пазтнэ, конат содавикст ве таркасо, лиясо арасть, тосо «эрить» лият. Неень шкане муезь од материалт, конат кемевтить фольклорсо Анге Патянть улеманзо.

Светлана Пивкина