Ломантне свал бажасть содамс эсь раськень, сымень-буень ды семиянь юртнэнь. Оштё 1555-це иестэ Россиясо теезель правительствань «Государев родословец» книга. XVIII-це пингенть прядовомсто дворянонь ламо генеалогиятне мусть тарка Н.И. Новиковонь «Бархатонь книгасонть», конань нолдавтызь сынсь дворянтнэ: истя сынь бажасть кемекстамс эсест привилегиятнень.

Неть дворянтнэнь ютксо ульнесть Нарышкинтнэяк, конат кадсть редявикс тешкс Россиянть эрямопингесэ. Вейке легенданть коряс, дворянонь те буесь саи ушодксонзо Крымень татаронть Мурадка Курбатонь пельде, кона 1465-це иестэ сась служамо Московов Иван III Васильевичнень. Ине чирязось саизе сонзэ эсензэ окольничейкс. Мереме тензэ кармасть Нарыш эли Нарышко. Сонзэ цёранть Фёдор Забелань ульнесь Исаак тяказо, кона служась Рязаньсэ наместникекс ды сёрмалесь прянзо уш Нарышкинэкс. Сон лововияк те фамилиянть ушодыцякс. Те мелесь — Нарышкинтнэ лиссть булгарсто-татарсто — А.И. Халиковонь. Россиянь лия содавикс антропонисттнэ молить тень каршо.

Генеалогиянь лия легенданть коряс, Нарышкинтнэнь апокш буентень васня тунь эзь эряво кепедемс дворянонь эсь лементь (нарышка — кургсто апаро чине. — Даль). Те кармась теевеме 1672-це иень якшамковонь 22-це чиденть мейле, зярдо Алексей Михайлович Романов инязорось урьвакстсь Наталья Кирилловна Нарышкина лангс. Тень кувалма Нарышкинтнэ уставасть ливтеме эсь лементь германонь наристи буень этнонименть пельде. Те буесь ледстневи Римень историкенть Тацитэнь «Германия» сёрмадовкссонть.

«Рязанень энциклопедиясонть», кона лиссь аволь умок, ёвтазь: келя, Нарышкинтнэ — Тарусань дворянонь апокш буе, кона содавикс XVI-це пингень куншкавидьстэ саезь, зярдо Алексей Михайлович инязорось урьвакстсь омбоцеде ды никс саизе Кирилл Нарышкинэнь Наталья тейтерензэ. Сынст пельде чачсь Пётр I. Сонсь Наталья Кирилловна (1651—1694), кода инязорава, ды лия Нарышкинтнэ масторонь тевтнень ветямосо яволявтсть эсь прядост ансяк 1689-це иестэ инязорэзементь лангсто Софья Алексеевнань каямодо ды те эзементь лангс Пётр I-нь озамодо мейле. Лев Кириллович Нарышкин (1664—1705) бояроль, 1690—1702-це иетнестэ Посольской приказонь прявтоль. Документтнэсэ самай XVI-це иень куншкавидьстэ васенцеде ледстязь Нарышкинтнэде.

Ванстовсть пачтявкст лиядояк: икелепелень инязоравась эйкакшпингензэ ютавтызе тетянзо имениясо, кона ульнесь Переяславль-Залесскоенть эйстэ 18 вайгельбень туро, неень Алешня веленть таркасо (Рязанень областень Рыбноень район). Нарышкинтнэнь усадьбаст ды дворецэст ульнесть истя жо Кремлясо ды Рязанень Переяславлянь Ало Посадсо. Теке буень бояртнэнь кедьсэльть неень Рязанень областень ламо велетне.

Бути одс велявтомс кортамонтень, косто тусь Нарышкинтнэнь фамилиясь, эсь пельде мерян: секень вант, сонзэ юрсо ашти христианствадо икелень эрзянь (мокшонь) Нарыш лемесь, конанень поладозь вишкалгавтыця -к/а суффиксэсь. Тенень кемевтить XVI—XVII-це пингетнестэ тевтнень ветямонь конёвтне. Вана эйстэст ансяк зярыя сёрмадовкст: «Деревня Сабанчеево. Антон Ризаев — 40 лет, у него жены Мельшай Нурашкина — 30 лет»; «Деревня Атяшева на пьянских вершинах Сулеменского беляка, а в ней мордва Наруш Валгушев»; «Деревня Маресева на Медянской вершине против Житного острова, а в ней мордва арзамасские прихотцы Буянка Нарушев».

Эрзянь ды мокшонь кезэрень ламо лемтнень юрсо — нарамс валось: Наруш, Нураш, Норуш, Нарыш, Наракша, Нарай ды лият. Сынст эйстэ тусть Наракшин, Нарашкин, Нарайкин, Нараев ды лия фамилиятне, конат ванстовсть эрзятнень ды мокшотнень ютксо течис.

Николай Мокшин,

историянь наукань доктор,

профессор