Ярмаконь асатноманть кувалма 1918-це иень январень 21-це чистэ ВЦИК-сь нолдась декрет, конань коряс кредитэнь уликс билеттнэнь кондямокс кармасть лововомо государствань казначействань нурька шкань 5 процентэнь обязательстватнеяк. Керязь купон марто сынь теевсть РСФСР-нь правительствань ярмаконь чешксэкс. Ярмаконь таркас якасть Олячинь Займань облигациятнеяк, конатнень нолдакшнынзе Временной правительствась. РСФСР-нь Народонь банконь 1918-це иень апрелень 26-це чинь циркуляронть коряс, ярмакокс яволявтозельть революциядо икелень весе питней конёвтне, конат нолдтневсть ярмаконь чешксэкс. Сынь келейстэ якасть Куншка Равчирень губерниятневаяк. Тень пингстэ эрьва губерниясонть инфляциянь анолдамонь ды од ярмаконь совавтомань кевкстематне топавтовсть эсь ладсо. Истя, Симбирскоень губерниясо весе купюратнень лангс штемпельтне путневсть Народонь банконь отделениятнесэ. Казанень губерниясо сюпав ломантненень мерезель весе ярмакост максомс банконь отделениятнес, эстест кадномс 2 тёжат целковойде а седе ламо. Теде башка, Куншка Равчирень весе губерниятнесэ кредитэнь билеттнэнь марто вейсэ нолдазельть яксеме 20, 40, 50 ды 100 целковоень питне Олячинь Займань облигацият. Купононь лопаст керсевсть, ды те ульнесть уш аволь облигацият — эсь коень ярмакт. Симбирскоень губерниясо ярмакокс яксесть государствань займань лоткавтозь облигациятнеяк, конатнесэ заводсо макснесть зарплата, лавкасо-косо пандтнесть рамавксонь кисэ ды истя седе тов. Тень пингстэ, бути Симбирскойсэ штемпельтне путневсть Олячинь Займань весе купюратнень лангс, Карсуньсэ — ансяк 50 целковоень, Сенгилейсэ — 100 целковоень номиналтнэнь лангс. Самарань губерниясо ломантнень, конатнень кедьстэ мукшновсть 1 тёжа целковойде ламо ярмакт, учость покш кажот. Тесэ вейкетьстэ якасть инязоронь шкань купюратнеяк, Временной правительствань ярмактнеяк, государствань займань облигациятнеяк.

1918-це иень январень 4-це чистэ лиссь «Купонтнэнь ды дивидендтнэнь коряс пандоматнень лоткавтомадо» декрет, конань алов кедь тешксэнзэ путызе В.И. Ленин. Сень кувалма, мекс РСФСР-нь Народонь банконь конторатнес, отделениятнес ды казначействатнес сон сась а сеске, неть учреждениятне яла поладсть ярмаконь чешксэкс купононь пандоманть.

1918-це иень апрелень 5-це чистэ финансонь комиссарось Бубляев яволявтызе государствань займатнень лоткавтомадо декретэнть, кона кемекстазель РСФСР-нь ЦИК-нь 1918-це иень январень 21-це чинь промкссо. Сонзэ коряс секе иень маень 1-це чис весе займатнень эрявсть максомс казначействав. Кадномс меревсь ансяк государствань казначействань 3,6 ды 4 процентэнь (сериянь) билеттнэнь, государствань казначействань 5 процентэнь обязательстватнень ды 100 целковой видьс Олячинь 5 процентэнь Займатнень. Сынь якасть кредитэнь билеттнэнь марто вейкетьстэ.

Башка эряви меремс ярмаконь эмиссиядонть, конань ютавтсь советтнэнь каршо молиця КОМУЧ-нь правительствась. Те ульнесь Куншка Равчирень кой-кона таркатнесэ Советэнь властенть каямодо мейле 1918-це иень июньстэ-ноябрясто. КОМУЧ-нь правительствась сеске ютавтсь ярмаконь реформа. Большевиктнень кедьстэ саезь модатнень лангсо сон яволявтсь «эсь» валютань якамодо. Эсензэ ярмактнень лангс штемпелень путнемадо башка, сон ветясь ярмаконь чешксэнь ды облигациянь билетэнь перфорация. Тень тейсть «Государствань банконь» отделениятне, конатнень тевест ладясть Народонь банконь Самарань икелень отделениянь важодицятне. Казначействань билеттнэнь ды Олячинь Займань 25, 50, 100 ды 500 целковоень питне облигациятнень лангс сынь путнесть фиолетовой, якстере ды сэнь штампт. Теде башка, ютавтнесть инязоронь правительствань 1905, 1914, 1915, 1916-це иень внутренней займань облигациятнень, 4 процентэнь рентань ярмактнень перфорация (пельнесть эйзэст эрьва кодат пачтявкст).

Неть ярмактнень питнест аштесь КОМУЧ-нь правительстванть военно-политической нардевчинзэ эйстэ. Бути васня (1918-це иень июнь-июль) лангозост кой-мезе рамавиль (мертяно, 10000 целковойде — кавто кемть), 1918-це иень августсто уш сынь теевсть тунь чавокс. КОМУЧ-нь правительствась ярмаконь эмиссиянть ютавтсь эрицятнень кедьстэ ули-паронь (ярсамопелень, фуражонь) саеманть, советтнэнь властенть каршо тюремань ветямонть кисэ.

Гражданской войнась кармавтызе советтнэнь правительстванть кадомс ярмаконь реформанть ютавтомадо меленть. «Военной коммунизмань» политикась пек киртизе ярмактнень якамост. Ярмаксо каявкстнэнь меньгак лезэст арасель. 1918-це иестэ саезь продразвёрсткакс пурназь ярсамопеленть кисэ пандсть питневтеме конёвонь ярмаксо. Кой-кона исследовательтнень ловомаст коряс, Гражданской войнань иетнестэ ярмаконь эмиссиянть ды инфляциянь арасьчинть вельде советтнэнь правительствась таштызе-пурнызе масторсо малав 20 процентт ули-паронть.

Ярмаконь системанть ламонь таркава лондадоманзо кувалма пек беряньгадокшнось промышленностень ды народонь хозяйствань лия пелькстнэнь финансированиясь. Те тевенть саекшнизь эсест лангс РСФСР-нь Народонь банконь Ссудань отделэсь ды сонзэ отделениятне, конат капшазь теезельть масторонь келес.

Ялатеке ярмактне эзть сатно, сындест эрявсть ламо. Васняяк, продразвёрсткань политиканть закононь коряс (куш аламошкадо) ютавтоманть кисэ. Омбоцекс, эрявсь пандомс Якстере Армиянь боецтнэнень ды командиртнэнень, сынст семиятненень. Секскак Гражданской войнань иетнестэ госбюджетэнь дефицитэсь вельтявкшнось эмиссиянть вельде. Лиякс сестэ, секень вант, а кодаль: производствась, ловт, тунь лоткавтозель.

1918-це иенть прядовомсто РСФСР-нь правительствась кундась ярмаконь системанть одкстомтомо. РСФСР-нь СНК-нь 1918-це иень октябрянь 26-це чинь декретсэнть Народонь банконть эмиссиянь правазо пачтязель 33,5 миллиард целковойс, 1919-це иень маень 15-це чистэ эмиссиянь лимитэнтень путозель пе овсе, 1918-це иенть ушодовомсто саезь 1921-це иень июньс ярмактне ламолгадсть сядоксть.

Куншка Равчиресэ ярмаконь курсось кемекставсь Гражданской войнань иетнестэ спекулянтонь «раужо» рынкасонть. Ломантне бажасть седе курок явомс ярмаконь чешксэст марто, мезеяк рамсемс лангозост. 1919—1920-це иетнестэ Куншка Равчиресэ ярмакокс якасть пек эрявикс ды а сатныця товарт (сал, пицькат, керосин, коцт, кши, таргамкат ды лият).

Эрзянь-мокшонь ёнкссо зярс муезь се шкань государствань ярмаконь вейке чешкс. Те — Тамбовонь губерниянь Темникова ошонь казначействань печать марто 20 целковоень покшолмасо Олячинь Займань 1918-це иень облигациясь.

Вячеслав Заварюхин,

историянь наукань кандидат