Сёрма тядяти

2010-07-26 18:14:03


Тядде кодгемонь вете кизот, кода аделавсь Великай Отечественнай войнась. Аделавсь минь Сяськомасонк. Но нинге тячимс апак кеподть модаста и апак калмакт кода эряви вишке бойса сембе шавфне, апак пачфтть сянди кинди лемтьфтольхть солдатонь сембе сёрматне. Но тевсь тя видеса мольфтеви.  Вов аф кунара пачкодсь раднятненди сёрмась конац тяштьфоль фронца нинге тёжянь вейхкса сятт нльгемонь васенце кизоня. А тевсь лиссь вов кода. Сёрмать кучезе  Мордовиянь Ромодановскяй райононь Курилово велень авати Прасковья Вельдяскинати  цёрац Илларион. Но пачфтемс адрес коре сонь изь удала. Почтать нльгемонь васенце кизонь июльста фатязь немецне, и ускозь Австрияв, штоба содамс кодапт мяльежесна Якстерь Армиянь солдаттнень. И вов тяддень февраль ковста тёжянь сяда кафксогемонь кота сёрмась мрдафтфтольхть Киев ошень Великай Отечественнай войнань историянь мемориальнай комплексти. Тостоконь покодихне эсток кармасть вешендема солдаттнень роднойснон. Украинецнень даннайснон коряс Илларион Вельдяскин лувондовсь шавфокс нинге нльгемонь васенце кизоня. Но кода содавсь тя аф тяфта. Прасковья Вельдяскинать унокоц азондозе: войнада меле Илларион патяц эрясь шачема велесонза и покодсь учителькс. А сяда меле Надежда аванц  мархта тусь эряма Киеву. Тоса шачсть шабасновок. Мзярда музеень покодихне содасть тянь квалма, эсток ушедсть вешендема солдатть раднянзон. Музь аванц, Надеждань, конац тячимс шиса и цёранзон Евгениень и Владимиронь. Семьяти эсток прважафоль сёрмать кописяц. И вов мезе тяштьсь Илларион эсь тядянцты нльгемонь васенце кизоня. "Шумбрат, тядяй. Мон, тонь цёраце, Илларион, шисан и шумбран, мезе теетьке арьсян. Ня шитнень прважань тейть посылка, а нинге тяда инголе сяда цалковай ярмак почтать вельде и колмогемонь цалковай сёрмаса. Тяштть тейне, получайть ли тон тянь семботь или аш. Монь адресозе мзярос тяфтама: Каменец-Подольская область, Каменец-Подольск ошсь, нльгемонь сисемце почтань ящиксь, Вельдяскин Илларион Спиридоновичти. Щять мон нинге аф туян тя вастста. Сёрматт теень, сявозь ли армияв Ивантть и Серафимть. Кода тон эрят, тядяй? Ули ли тонь кшице? Кальдяв аньцек, што войнась уставась. Немецне – сволочне кодавок аф сютямихть. Кда удалай, то маластонь пинть нинге кучан тейть ярмак. Улян шиса лездан тейть. Кодама кулят Куриловаса? Аст эздон оцю привет сембе раднойхненди. Тянь лангса и аделаса. Пяк мялезе куду повомс, но тя сяда меле. Пока, тонь Лараце".  Эряви азомс, што сёрматнень ёткса, конат мрдафтфтольхть Киевонь музейти, Иллариононь тяштьфтонза башка Мордовиянь адрес мархта улихть нинге вете.