Саранскяйть Пролетарскяй районцонза маластонь пингть путови од идень поликлиника. Тянь квалма корхтафоль пяденцяста ошень администрациять совещанияса, конань ётафтозе мэрсь Владимир Сушков. Нинге корхтамаса участия примасть строяйхне, архитекторхне, социальнай политикать коряс департаментонь вятись Галина Лотванова и лиятне. Совещаниять пингста азфоль мезе вешови тя проектть эзда, и мзярда ушедома строямась. Владимир Сушков китькстазе, конашкава эряви тя поликлиникась и мярьгсь, што тефнень ламошкаснон тиема нинге тядде. Тяконь ёткса путомат зданиять цокольнай и васенце этаженза. Тячиень шиня ошть тя районцонза башка ащи идень поликлиника аш. Врачне сратфт эрь кодама ульцяса лама этажса эрямань кудга, фкя фкянь эзда сатомшка ичкозе. Мезсть шарьхкотьф ламода стакалгофнесыне эряфснон од тядятнень и пиже шабатнень.