Мордовиянь прявтось, Николай Меркушкин ютавтсь совещания архитектортнэнь, дизайнертнэнь ды строительнень марто. Совещаниясь ютавтозель Оперань ды Балетэнь театранть площадканть лангсо. Кода пачтясть прявтонть администрациясто, ваннозель зданиянь строямонь молема лувось, кармавтозель витемс театрань чачонь зярыя ёнкст. Совавтозельть полавтовомат и зданиянть потмонть мазылгавтомантень. Эряви тешкстамс, весе важодемань- строямонь тевтнень арсеви прядомс кавто тёжат кеменце иень пес. Ансяк нейгак чарькодеви, Оперань ды Балетэнь театрась карми минек ошонь эште вейке мазый таркакс. Тей совавтозь од технологиятне кармить пачтямо залонть од гайгемасо. Кармавтозь рамамс сценань од оборудования. Арсезь и кепедемань механизмась. Сонзэ вельде спектаклядонть мейле сценанть лангс кепедеви весе оркестрась. Те сизьгемень- кавксоньгемень музыкантт. Совещаниянть пингстэ кортазель театрань вакссо территориядонтькак. Сонзэ мазылгавтсы фонтанось ды цецятне. Оперань ды Балетэнь театранть питнезэ вейксэсядт вейксэньгемень миллионт целковойть. Эйстэдест комсь миллионтэнь явинзе республикань бюджетэсь, кадовозетнень- федеральноесь. Тешкстан, театрась строяви эрзя- мокшонь ломантнень Россиянь государствань лия раськетнень марто вейсэндямосто тёжа иетненень.