Медьковонь 10-це чистэнть, шлямочистэ, Покш Игнатбуень Чукал велесэ нилецеде ютавтовсь Эрзянь раськень Покшчись – «Раськень Озксось». Пуромокшность инжеть масторонь эрьва едо: Пензасто, Ало ошсто, Ине Петрань ошсто, седе ламотне нама, Самарасто.

Кода содатано Озкстнэ эрсить кудонь, буень, велень, сехте покшось ды сюпавось -те Раськень Озксось. Сонзэ сюпавдояк–сюпав домкачизэ. Те Озкстонть башка лията Озкстнэ эрьсить эрьва иестэ, кой-конататне натой мик знярыянь кирда иезэнзэ. Раськень Озксось ютавтневи аволь сеедьстэ, ниле иес весть.  Таркась пурназь а стяко. Игнатбуень Чукалы велень вакссо Мардонть улить ламо пелькстамот. Веенст кортыть, тесэ ногайтнень марто тюремадонть мейле калмазь малав 11 тыщат воинт: эрзят, мариецт, чувашт ды удмуртт. Вейсэнь калмось теезь курганонь кондямокс, конань ало ашти ловажа марто кевень саркофаг. Омбонцтнэнь мелест коряс те Марось теевсь икелень Озкстнэнь пингстэ пуромозетнень модань кандомань кувалт. Улить и лия пелькстамот, нама, те шкас те таркатнесэ апак ютавт кодаткак архиологической ванномат, секскак мертяно ансяк -те Мааронть вакссо Раськень Озкстнэ ютавтовить коень коряс, конатнень ундокстнэ аштить куншка пингетнесэ.

Те иень  Озксонть панжизь  Мордовия Республиканть Национальной театрань налкицятне, «Келу» ансамблянь морыцятне. Театрализованной  налксемасо невтизь, кода икеле ютавтовилть Озкстнэ минек енкссо. Седе тов Озксось поладовсь Мааронть лангсо. Те иестэнть, коень коряс те Ине тарканть куншкас стявтозель штатол, конань  Озатясь  кирвастизе торамонть гайгеманзо пингстэ. Седеень ризневтыця те шкась, зярдо покш штатолось кирвайсь. Пурнавозетне ве вайгельс Озатянть мельга рангстасть Пазморо «Пазчанготь» ды кепсизь кедест верев, сюконясть модас.

 Седе тов, кода икеле шкатнестэ, мааронть малава сокас кильдезь алашанть ветизь од цератне, таргасть кикс. Сонзэ эйс  эрьвась каизе паргинестензэ, пацине поцтонзо туезь моданть.  Истя теевсь Ине сюлмавксось Покштятнень, Инешкипазонть ды Пертьпельксень кирдийтнень марто, раськесь вейсэндяви весе эрзянь ломантнень марто. Тееви кеме ды  шумбра раське. Мейле Мааронть перька пуромозетне кундасть кедте-кедьс. Зярошка вий! Ломантне ютасть паксянть перька ды пуромсть куншка куронтень, косо теевсть содавиксэкс вейке вейке марто.  Аламо шкань ютазь Озксось поладовсь.

Маронть ве ено од цератне пурнасть пелькстамот торонь ертнемасо. Омбоце енксось мазыгавтызь эрзяватне мазый оршамопельсэст,  тосо ютавтовсь оршамопелень невтемась.Мааронть вакс Атянь Эземс пурнавкшность содавикс эрзянь ломантне. Инжетне евтасть сюкпрят Раськень Озксось пурныцятненень-ютавтыцятненень, арсевсь сы Раськень Озксонь ютавтома шкась.Ули  сон ули ниле иень ютазь, медьговонь васенце шлямочистэ (суббутасто). Истя ютавтовсь те иень кенярксось, эрзянь ломанень вастовомась.

Озксонь омбоце чистэнть эрзянь од ломантне вастовкшность Саран ошсо. Прявсоль Ине Петрань ошсто Озксонь тувталсонть сазь Петрань Андю (Андрей Петров), перьканзо пурнынзе Мордовиясо кельсодыень факультетэнь прядыця студентнэнь, од журналистнэнь ды Ине Петрань ошсто сазь инжетнень. Вастовоманть перть кортавсь минек келенть марто сюлмавозь кажов тевтне. Тешкстазелть тувталтнэ мезень коряс еми минек келесь. Васенцесь - од ломантне, паряк, виздить кортамс, паряк, чумот тетятне-аватне, конат а кармавтыть кортамс тиринь кельсэ, эли школатне, конатнесэ аволь эрявикс домкасто тонавтови  эрзянь келесь. Нама, теде башка од ломантне явсть мель лездамс Андюнень «Вий кепеди»- интернет -нупаленть материалонь  пештямо тевсэнть. Сехте ламо кортамотне мольсть ялатеке ютазь Раськень Озкстонть, сонзэ паро енкстнэде ды асатыкстнэде.

Мезе лангскак апак вано, эряви тешкстамс, Раськень Озксонь ютавтома коесь вейсэнди эрзятнень, невти минек сюпав коенек, ды сралезь-стувтозь оймеежомарямочинек. Сон невти эрзянь раськенть  сеть шкатнень вейсэнь лувонзо, конась минек шкатнес эзь ванстово…